السبت، 30 ديسمبر 2017

الملك الجسور
صحيح كل واحد له حظ من اسمه!
اسمه (جسر), وبنطق الخواجات (زوسر)!
الجسور بيواجه!
الجسور مبينكسفش ويداري مشاكله, أو يكفي ع الخبر ماجور!
مرت مصر وقتها بظروف مجاعة, بسبب نقص ماية الفيضان, واجه الظروف, وحل المشكلة مع متمردين الجنوب اللي حولو مجاري النهر, وكمان وثقها, كتبها ع الحجر (لوحة المجاعة فـ أسوان), عشان اللي بعده يعرف يتصرف لو اتكررت!
حملاته فـ الشرق, كلها جسارة, يعني مشاكل مصر مع حدود الشرق, مش من ايام الهكسوس وبس, لا من قبلهم بكتير, عمل حملة طرد المتسللين, وعمر المحاجر, وعمل نقط مراقبة للحدود!
الجسارة مش فتونة وشجاعة بس, انما الجسور اقتحام ومواجهة للمشاكل!
الملك الجسور (جاسر), بنا أول هرم (الهرم المدرج – سقارة)!
الملك الجسور, اختار معاه معاونين علا نفس مستواه, وأكتر كمان!
الملك الجسور, كان معاه أول وأهم مهندس وطبيب وفلاسفة الكون (امحتب)!


الصورة رسم لنقش من وادي المغارة فـ سينا, الملك الجسور (جسر), بيأدب ويطرد المتسللين!

بنتكلم مصري

اللغة بتتكون من خمس حاجات:
نحو
صرف
ألفاظ
أصوات
عوايد (عادات لغوية)

كلامنا المصري, فيه كل العناصر الخمسة دي, موصولة مع أقدم مراحل اللغة المصري القديمة, يعني من مراحل الكتابة بالحرف الهيروغليفي والديموطيقي والقبطي.
عندنا 224 قاعدة نحو وصرف خاصة بكلامنا المصري, ملهاش علاقة بالعربي.
بنتكلم مصري .. مش لهجة ولا عامية من العربي.
بعضنا بيعرف يتكلم عربي كمان .. انما كلنا بنتكلم مصري!

الجمعة، 29 ديسمبر 2017

صب
#بنتكلم_مصري
الـ (صب), نزول واندفاع السوايل, للنضافة أو للزواق أو غيره!
معنا الصورة واضح أوي, مش محتاج شرح!
صب الماية/ صبة الخرسانة
وفـ القرآن الكريم: (أنا صببنا الماء صبا)!

كتابي اللي جاي عن (ألفاظ المصري في القرآن) ..
60 % من جدور ألفاظ القرآن الكريم, من المصري القديم!

الخميس، 28 ديسمبر 2017

برت .. برد

الدنيا برد .. الدنيا برد .. عم خليل بيقطف ورد

#بنتكلم_مصري


التقويم المصري, بيقسم السنة لتلات فصول, مش أربعة:

·         آخت/ أكد: الفيضان/ تأكيد وتمام الفيضان (ظهور ونهاية الفيضان أربع شهور).
             توت/ بابه/ هاتور/ كيهك

·         برت/ برد: شتا
            طوبة/ أمشير/ برمهات/ برمودة

·         شمو: صيف (عشان كده شم إنسيم = نسمة الصيف)
            بشنس/ بؤونة/ أبيب/ مسرا


صباح أون - تاريخ احتفالات المصريين بالأعياد والمناسبات ـ سامي حرك

لقاء حول كتاب (بنتكلم مصري) مع كاتبه أ. سامي حرك - (الجزء الأول)

كتاب #بنتكلم_مصري

اسم الكتاب: #بنتكلم_مصري
الكاتب: سامي حرك    
الطباعة: مطبعة جامعة القاهرة
النشر: حقوق النشر محفوظة للمؤلف, ت: 01286175455.

رقم الإيداع بدار الكتب: 20317/ 2017


كتابنا بيقدم قواعد آخر مرحلة من مراحل اللغة المصري, وبيديها إسم خاص بيها, من صلبها, يعني منها فيها, الإسم هوه:

(اللغة المصري)

الكتاب بيقدم, لأول مرة, جدول مشروح لعدد (224) ملمح وقاعدة لكلام المصريين الحالي.