الأربعاء، 31 يناير 2018

عـيـش



رغيف العيش!
عيش وملح!
عيش وطعمية!
عيش وحلاوة!
عيش وجبنة!
عيش حاف!
عيش وغموس!
طبونة العيش!
تخيلو كده .. كل الكلام اللي فوق ده, كلام مصري 100%
كلها تعبيرات مصرية, اتسربت لـ لهجات ولغات المنطقة, مش بس كده, كمان دخلت القواميس والشعر العربي والعبري وغيرهم!
جدور الكلام مصري, وفروعه مصري!
الصورة بتوضح نطق ومعنا كلمة (عيش), بالحرف الهيروغليفي:
عيش = وجبة/ أكلة/ نوع من المخبوزات!
الصورة بالحروف والرموز واضحة للكل!
شوفتو مخصص (رمز) العيش, رغيف الفرن البلدي بتاع زمان!
مصر القديمة كان فيها 30 نوع من أنواع العيش, كل نوع له اسم ومناسبة!
#بنتكلم_مصري
مرسلة بواسطة في ليست هناك تعليقات:

الثلاثاء، 9 يناير 2018

ladies first

مسا الهنا .. يا للا نقرا شوية مصري بحروف الهيروغليفي!
فـ الصورة زهرية جميلة أوي, من عهد الملك أمنحتب التالت (1391 ق.م).
طبعن احنا بنقول التالت والرابع والخامس, ده شغل كتاب ومؤرخين, يعني مكنش حد من ملوك مصر بيقول أو بيكتب اسمه مع رقمه أو ترتيبه!
الكلام المكتوب ع الزهرية, فيه تلات خراطيش!
والخرطوشة يعني المستطيل البيضاوي اللي جواه الكلام المكتوب!
وكل ما تشوف خرطوشة تعرف ان الإسم اللي جواها, اسم ملك أو نتر (مقدس)!
يعني صعب تلاقي اسم ملك مش فـ خرطوشة!
الخراطيش التلاتة للملكة تي وجوزها الملك أمنحتب والوصف المقدس!
تقديم اسم الملكة بيطبق قاعدة حضارية مهمة ladies first  
كلام التلات خراطيش, مكتوب فـ تلات عواميد:
ع اليمين: فوق (نسوت = الملكة) – جوه (تي)!
فـ النص: فوق (نتر-نفر = رب جميل) – جوه (نب-معاط-رع = سيد عدالة رع)!
ع الشمال: فوق (صا-رع = ابن الشمس) – جوه (امن-حتب-حقا-واصط = امنحتب حاكم طيبة)!
تحت الخراطيش دعا بالصحة (سنب), والحياة (عنخ), والخلود (دجت), بالترتيب م اليمين للشمال!

زهرية أمنحت التالت, محفوظة سليمة بألوانها, فـ متحف اللوفر – باريس!
مرسلة بواسطة في ليست هناك تعليقات:

السبت، 6 يناير 2018

أفعالنا ممنوعة من المجوز


مفيش فـ كلامنا مجوز,
لا للأدوات ولا للأفعال!
الولدين بيلعبو/ البنتين بيتعلمو! .. لا بيلعبان, ولا بتتعلمان!
اللغة العربي فيها المجوز لكل حاجة, اسم وفعل وأدوات وضماير وصفات وظروف!
المصري معندوش مجوز الا للأسامي بس, وبسيط أوي, وبصعوبة كمان!
نعرف ان ده ماشي مع شخصية المصري, لما بيقول:
صاحب بالين كداب!
والمركب اللي فيها ريسين تغرق!
الأسامي ممكن تتكرر, عشان الحاجة الواحدة ممكن يكون لها أكتر من اسم, انما الأفعال لأ! يا عملت يا معملتش! يا كتبت يا مكتبتش!
الأسامي فيها كل الألوان, الأفعال لأ! يا أبيض يا اسود!

القاعدة (17) – صفحة (83) - #بنتكلم_مصري
مرسلة بواسطة في ليست هناك تعليقات:

كتاب بنتكلم مصري


بيتوزع فـ القاهرة:
(مدبولي) ميدان طلعت حرب/ (عمر بوك ستور) ش طلعت حرب, فوق فلفلة/ (ليلى) ش جواد حسني/ (مبتدا) البورصة/ (بورصة الكتب) ش شريف.
فـ اسكندرية:

(منشأة المعارف) ش سعد زغلول/ (أحمد البوري) ميدان الرمل.
مرسلة بواسطة في ليست هناك تعليقات:
الاشتراك في: الرسائل (Atom)