الجمعة، 24 أغسطس 2018

نوبة



آدي كمان كلمة خاصة بالمصريين!
(نوبة), يعني مرة/ دور/ نصيب/ كوم/ مناوبة .. لخ!
-          معلهش النوبة دي, عشان خاطري!
-          كل واحد له (نوبة)!
ومنها (مناب):
-          أنا مخدتش منابي!
والفلاحين بيعدو أيام سيبان الماية فـ الترعة, عشان كل واحد يروي فـ (النوبة) بتاعته!
ومع اللاحقة (جي), تبقا (نبت-جي/ نبطشي)!
#بنتكلم_مصري
الكلمة ومعناها فـ الصورة, مش محتاجة شرح, من مرحلة الخط الهيروغليفي:
نوب = مرة/ دور/ كل واحد/ أي واحد!
الفازة أو الزهرية, بتتنطق (نو)!
............
عندنا أكتر من خمسة وتلاتين ألف كلمة, من جدور مرحلة الهيروغليفي, وكمان قواعد كلامنا كلها (224 قاعدة), يعني الألفاظ والقواعد, كلهم مصري .. محدش بقا يقول علا كلامنا (عامية/ دارجة)!
............
معلهش النوبادي .. سماح النوبادي .. كلامك يا مصر .. لك حبي وفؤادي!


الخميس، 23 أغسطس 2018

لبنان



حتا اللبانيين ميعرفوش أصل اسم بلدهم!
والتفعيصة المنتشرة, انها تصريفة من اللبن!
..............
علاقة مصر بـ لبنان, قديمة أوي, وتلاقي اسمها داخل فـ صيغة من حكايات ايزيس وأوزوريس!
مصر كانت بتعين حاكم لـ لبنان, من أيام الملك (سنفرو) – أسرة رابعة!
لبنان جزء أساسي من معارك تحتمس ورمسيس, وتغريبة سنوحي!
.............
شوف بقا جدر كلمة (لبنان), من مرحلة الحرف الهيروغليفي:
رمنان/ لمنان = لبنان Lebanon
-          معناها ايه؟
-          رمنان/ لمنان = فم آمون/ حنك آمون/ البوء بتاع آمون  The mouth of Amon
..............
يعني حلاوة كلام اللبنانيين, خلت المصري القديم يوصفهم بأجمل حاجة عنده (آمون)!
..............
تصريف الحروف, بالشقلبة (تغيير الصوت), وباللخفنة (تبديل مكان الصوت), جزء أساسي من اللغة, أي لغة!
حرف الره بيتشقلب مع حرف اللام (كروبترا/ كلوبترا – بطريموس/ بطليموس – سومار/ صومال)!
كمان الميم والبه, طول الوقت بيتشقلبو مع بعض, حتا فـ كلام الشخص الواحد (جنب/ جمب)!
.............
عاوز تعرف؟ عاوز تفسر؟ .. الإجابة بسيطة أوي: إعرف مصر!


الجمعة، 27 يوليو 2018

بخيت



اسم مصري صميم, وترجمته الحرفية = النزيه المحظوظ/ المستقيم صاحب الحظ!
شوفو انتو بقا تصاريف الإسم (بخت/ باخت/ بخيتة/ مبخوت/ مبخوتة .. لخ)!
#بنتكلم_مصري
جدر الإسم من مرحلة الحرف الهيروغليفي: 
بخيت = أسد  lion
فيه شخصية قديمة حقيقية, مقدسة, اسمها (بخيت/ باخت)!
أساطير (بخيت) و(باستت), من عهد الملك (أمنمحات الأول), بتحكي عن أسد أسطوري, بيحمي الأفق (العالم), بكل نزاهة واستقامة, وبيفتح الطريق للسيول, عشان تروي الصحاري, وفيه صيغة تانية لنفس الأسطورة مكتوبة فـ بربا سيتي الأول/ أبيدوس!
................
تجسيد صورة الملك فـ شكل أبو الهول, ادا للأسد وصف الملك فـ كل أدبيات العالم!
والحقيقة ان الملك جسد صفات النزاهة والإستقامة والتعالي عن الأمور الصغيرة بشكل الأسد!
.................
لازم نقرا ونفهم نصوص مصر من تاني!
ده حق الجيل اللي جاي, ع الجيل الأولاني!


الأربعاء، 13 يونيو 2018

بركة .. مبروك .. بركات



(بركة) و(مبروك) و(بركات), كانت أسامي جميلة!
 (بركة) و(مبروك) و(بركات), لسة فـ كلامنا صفة, للخير!
-          (بركة) انك جيت بالسلامة!
-          ألف ألف (مبروك)!
-          (بركاتك) بتهل علينا, بفانوس رمضان
#بنتكلم_مصري
صورة جدر (بركة) و(مبروك) و(بركات), من مرحلة الخط الهيروغليفي:
باراكا/ بركا/ بركة = خير/ هدية/ منحة/ نعمة!
................
تصاريف كتيرة من الجدر (باركا), , فـ كلامنا المصري, وكمان العربي والعبري, وغيرهم!
كان: وزير دفاع اسرائيل (ايهود باراك), ورئيس أمريكا (باراك أوباما), ورئيس مصر (مبارك)!
................
أسامي كتير, من رموز اللغة والهوية المصرية, كانت مالية حياتنا, وفجأة بقت نادرة أو معدومة!
الكلام والأسامي, اللي من رموز الهوية, زاي أي ثروة متهددة بالإنقراض, محتاجة حماية!
................
تحيات وسلامات و(بركات) .. لـ مصر أم الدنيا, أم الأمهات!
...............
وسلامو عليكو


الثلاثاء، 12 يونيو 2018

بـس



من جواهر اللغة المصري (بس), والجواهر يعني القطع المميزة!
(بس), من الأدوات اللي وظفت أسامي النترو (المقدسين), لأنها وظفت اسم النتر (بس)!
زاي اسم النتر (حر/ حور), اللي بقا أداة ظرف مكان (فوق/ علا)!
وزاي اسم النتر (بتاح), اللي بشقلبة الحه مع العين, بقا أداة الإضافة (بتاع)!
................
(بس), بنستخدمها فـ كلامنا بأكتر من طريقة:
(بس), أداة فـ جملة الكفاية, زاي (فقط) فـ العربي, و(only) فـ الإنجليزي!
-          بس خلاص, سمع هوس!
(بس), أداة فـ جملة المتابعة, زاي (لكن) فـ العربي, و(but) فـ الإنجليزي!
-          بس قوللي أي حاجة يا حبيبي!
#بنتكلم_مصري
(بس) موجودة فـ الهيروغليفي بأكتر من شكل, اللي فـ الصورة دي أداة المتابعة:
بس = لو تقدر/ اذا تسمح  (if only)!
...............
(بس), بتزين كلامنا, وبتميزه!
...............
طوف وشوف, وسافر واتعلم ... (بس) مصر أمانة, بيها تتباها وعنها تتكلم!


الأحد، 27 مايو 2018

نعم .. نعمين



نعم ونعمين, فـ كلامنا المصري الحالي, أدوات فـ جملة الجواب!
بنسمع عبحليم بيغني:
-          نعم يا حبيبي نعم!
وسمعنا ليلى نظمي, ودلوقتي بتغنيها مروة:
-          أمه نعيمة نعمين!
#بنتكلم_مصري
جدر (نعم) من مرحلة الخط الهيروغليفي:
نعم/ نعمو = عزيزي/ سيدي/ بكل لطافة/ بكل سماحة/ فـ خدمتك!
ده ميمنعش, ان النعومة واللطافة دي ممكن تتحول لشتيمة أو تريأة:
-          نعم يا روح أمك!
..............
كنت فاكرها عربي, بسبب تصريفة بنفس الصوت والمعنا, فـ (القرآن الكريم):
(قال نعم وانكم من المقربين) – الأعراف.
..............
أول دروس الأدب .. قولة (نعم) حاضر!
يا مصر انتي الأساس .. فـ الماضي والحاضر!
.............
وسلامو عيكو


الاثنين، 21 مايو 2018

فـخـت



(انتي تفختي لي عيني, وأنا أفخت لك عين, ونعيش عور احنا الإتنين)
ده بيت الشعر اللي أبدعه الفنان سعيد أبو بكر (شيبوب)!
كلمة (فخت) لسة معانا فـ كلامنا الحالي, بس مرتبطة أكتر بأذية العين!
-          واحد عينه اتفختت!
جدر الكلمة من مرحلة الخط الهيروغليفي:
فخت = دوبان/ تصفية!
.....................
آدي واحدة من الجدور اللي التصريف مغيرش فيها كتير, نفس الصوت ونفس المعنا!
.....................
كلامنا الحالي, فيه أكتر من خمسة وتلاتين ألف كلمة, من جدور مصرية قديمة, وبتحكمه 224 قاعدة جرامر, كلهم جايين –بارضو- من أقدم مراحل اللغة المصري!
يعني كلامنا مصري, بالنحو والصرف والصوت واللفظ!
أمانة عليكم يا حراس الهوية المصرية, معدش حد بقا يقول ولا يكتب إلا بالمصري!
.....................
أنا مصري بالصوت والصورة .. أنا مصري وبلدي المنصورة!

الأحد، 13 مايو 2018

حـبـة



كلمة حبة, موجودة فـ كلامنا الحالي, بأكتر من معنا:
حبة = قطعة واحدة (حباية/ حبايات) !
حبة = ثمرة (برتقاناية/ خياراية/ جوافاية .. لخ)!
حبة = بذرة (وجمعها حب/ حبوب)!
حبة = مسافة/ مساحة (قرب هنا حبة)!
حبة = حالة (حبة فوق, وحبة تحت)!
#بنتكلم_مصري
كل التصاريف دي وغيرها, جدرها من مرحلة الخط الهيروغليفي:
حبت/ حبة = نبات/ بذرة/ ثمرة/ قطعة!
الكلمة الهيروغليفي اللي فيها أكتر من مخصص (مادي ومعنوي), بيبقا الكاتب القديم قاصد يوضح انها بتحتمل أكتر من معنا, مادي ومعنوي!
عشان كده (حبة/ حباية/ حب/ حبوب/ حبات/ حبايات), كلها تصاريف مصري صميم.
بنشوف كمان من نفس الجدر السبعتلافي, تصريفة (حبة) فـ المرجع الأول لـ اللغة العربية:
(وان كان مثقال حبة من خردل أتينا بها) قرآن كريم – 47 الأنبياء.
..................
بنلاحظ فـ قواميس الهيروغليفي, ان الحاجة الواحدة, ممكن يكون لها أكتر من إسم!
الإسم اللي بيفضل معانا, هوه الإسم اللي بيناضل عشان يعيش, حسب قانون التطور!
اللغة كائن حي, بيتصرف وبيتطور, آلاف المرات, من غير ما يضيع الإسم!
قواعدنا وألفاظنا اللي لسة بتميز كلامنا, أرقا وأفضل منتجات قانون التطور!
................
وسلامو عليكو


الخميس، 26 أبريل 2018

وحوي يا وحوي



أشهر كوبليه, من أغاني فلكور رمضان!
- (وحوي يا وحوي .. إياحا)
بيغنيها الأطفال مع فرحتهم بفوانيس رمضان!
#بنتكلم_مصري
جدر الكلمة من مرحلة الخط الهيروغليفي:
وحو/ وحوي = طلة/ رجوع/ رجوع بعد طول الغياب  overlook
مع علامة المجوز (المثنا), شرطتين مايلين, بتتقال (وح-اوي) = طلتين/ مرحبتين/ أهلين .. لخ!
اياح/ اياحا = القمر (وكمان اسم أشهر ملوك وزعامات مصر, الملكة اياح-حتب)!
الإحتفال بالقمر, كان عيد كل شهر, موجود فـ قوايم الأعياد, ومع دخول الإسلام والإحتفال بالشهر الكريم, دخل الكوبلية المصري القديم فـ أعياد المصريين (لاحظو ان الجملة دي مش موجودة فـ أي بلد اسلامي,
غير فـ مصر)!
يبقا, وحوي يا حوي اياحا = طلتين ورجوعين بالسلامة للقمر/ مرحبتين يا قمر!


الخميس، 12 أبريل 2018

قـبـة



وصف مصري قديم للصدر, يعني مش الصدر كله طبعن, انما بالتحديد (الثدي)!
طيب, دلوقتي القبة, نوع من سقوف المباني, موجودة فـ المعابد والكنايس والجوامع والجبانات والقصور!
المهندس حسن فتحي, بدع شكل عمارة جديد, بيقوم علا تسقيف البيوت بالقبب!
أشهر القبب فـ مصر:
(قصر القبة), اللي بناه الخديوي اسماعيل, وبقا مقر للحكم, وكمان (قبة) جامعة القاهرة!
جدر كلمة (قبة) من مرحلة الخط الهيروغليفي:

قبة/ قابة/ قوبة = صدر/ ثدي!

السؤال بقا: المباني المقببة, خدت وصف قبة الصدر, ولا العكس؟
أعتقد الإجابة مش محتاجة تفكير: مين الأقدم؟ الإنسان ولا المباني؟

الأربعاء، 11 أبريل 2018

مـقـيـاس


قاس/ بيقيس/ مقاس
معجزة المصري القديم, فـ قدرته علا ترتيب وتنظيم عناصر الطبيعة!
كمان حياة الفلاح, ومهنة الزراعة, محتاجة معايير ومقاييس واحصا, للأرض وللمزروعات وللمنتجات!
من أهم المقاييس, استخدام الرجلين (القدمين), فـ قياس الأرض.
قاس = معيار/ مقاس!
شوف مخصص الرجلين, كأن واحد فلاح, ماشي بيقيس الأرض!
أو حكم كرة قدم, بيقيس المسافة بين الفاول والحيطة, بعشر خطوات!
نفس الكلمة بنستخدمها فـ كلامنا الحالي, بتصاريف كتير:
مقاس الفستان/ قياس الأرض/ مقياس النيل .. لخ!
ومن أدلة الفقه: (القياس)!

الثلاثاء، 10 أبريل 2018

#كلامنا-مصري


المصريين طول عمرهم, من آلاف السنين بيتكلمو مصري, تقريبن زاي اللي بنتكلمه دلوقتي.
المراحل اللي مرت بيها اللغة, متقسمة لمراحل حسب وسيلة (حروف) الكتابة: (هيروغليفي/ هيراطيقي/ ديموطيقي/ قبطي/ عربي), انما اللغة نفسها, يعني الصوت اللي بيطلع من البؤ, هوه هوه, بتغييرات طفيفة, بتناسب التطور الطبيعي لأي لغة حية.
كتاب (#بنتكلم_مصري), عبارة عن كتاب جرامر, قواعد كلام المصريين, من خلال (224) قاعدة لغوية, كلهم متواصلين مع قواعد كلام المصريين فـ المراحل الأقدم.
بالإضافة لكمية كبيرة من الألفاظ, وجدور الألفاظ, موجودة فـ كلام المصريين الحاليين, بنسبة فوق الـ (90%), بما فيها الألفاظ اللي شبهها عربي, وبالمناسبة القرآن الكريم فيه أكتر من (950) جدر لغوي, من جدور ألفاظ المصري القديم (مرحلة الخط الهيروغليفي), الجدور دي بتمثل حوالي (60%) من اجمالي جدور ألفاظ القرآن الكريم, اللي عددهم الإجمالي حوالي (1600) جدر!

الأربعاء، 4 أبريل 2018

فـسـيـخ


احتار الناس فـ أصل الفسيخ, رغم انها واضحة زاي الشمس!
هوه فيه حد يعرف الفسيخ غير المصريين؟
للأسف من كتر وطنية الفسيخ, تلاقي الهجوم عليه أشكال وألوان!
تفسيخ السمك, نوع من أنواع التمليح والتخليل والتعتيق, عشان يتحفظ!
كلمة (فسيخ) متصرفة من فعل مصري قديم (بسخ/ فسخ) = حفظ/ ملح/ خلل/ عتق/ حنط!
كان فيه نوع من البيرة المتعتقة فـ البيت (بيرة ستاتي), اسمه (بسخة/ فسخة)!
التمليح (بالملح), والتخليل (بالخل), وكل أنواع الحفظ للأكل (بسخ/ فسخ)!
عاوز تعرف أصل حاجة, شوف أصل اسمها!
وكل (شم نسيم), ومصر كلها بخير!
...................

وسلامو عليكو

الاثنين، 2 أبريل 2018

شوبيك لوبيك

شوبيك لوبيك/ شبيك لبيك  .. (كلمة مصري ومعناها بالعربي)
الجملة دي مرتبطة بالحواديت, وأول ظهور مكتوب لها كان مع حواديت ألف ليلة وليلة!
الجملة متكونة من الكلمة المصري (شوبيك), وترجمتها بالعربي (لوبيك/ لبيك)!
(شوبيك), عبارة عن الفعل المصري (شب/ شوب) = أجاب/ أحضر + الكاف, ضمير المخاطب (ك)!
المصريين صرفو الكلمة العربي (لبيك), وخلوها موزونة (لوبيك), مع الكلمة المصري (شوبيك)!
اسم التماثيل الصغيرة اللي بتكون مع الميتين (شوبتي/ شوابتي) = المجيبين/ الملبيين/ اللي بيعملو الحاجات, واللي بينفذو الطلبات .. متصرفة من الفعل (شوب) = يلبي/ يحضر/ يجيب .. لخ!


شوبتي Swbty = مجيب/ ملبي 
 

الجمعة، 30 مارس 2018

سـو


(سـو) جدر أصلي مصري .. (سوء) تصريفة عربي!

نسمع كده من الفولكور, كوبليه الموال ده:
(لو كان أبويا بعصاية الـعـو أدبني, ما كنت مشيت مع صاحب السو, بفعل السو أدبني!)
اسأل أي متعلم مصري, عن كلمة (سو) دي, ح يقولك: ده تصحيف وتحريف من الكلمة العربي (سوء)!
الحكاية مش كده خالص, والإنسحاق الوطني اللي عايشينه ده, لازم له حل!
آدي كلمة (سو) مكتوبة قبل العربي بآلاف السنين, من مرحلة الخط الهيروغليفي:
سو = مصيبة/ قاتل/ صايع/ حبسجي/ من المطاريد .. لخ!
يعني (سو) من مرحلة الهيروغليفي, هيه جدر (سو) فـ كلامنا المصري الحالي, وجدر (سوء) بتصريفة عربي, وكمان جدر (سو) بتصريفة نوبي, غناها محمد منير:
(سو يا سو حبيبي حبسوه!)
أما تحب تدور علا أصل كلمة, يبقا قبل ما تجري ع القواميس العربي والإنجليزي, شوف قواميسك!
مفيش أي مشكلة, وبلاش نتندم ع اللي راح, احنا ولاد انهاردة, وبإيدينا يكون الجاي أحلا:
-          نبدأ من دلوقتي حالا, نتعلم ونعلم ولادنا: (دراسات الهوية المصرية)!
................
وسلامو عليكو


الثلاثاء، 27 مارس 2018

سـك


(سـك) ع المشاريب!
جدر مصري قديم, بعلامة المساحة/ المكنسة!
سك = امسح/ اكنس!
بن
سمعها دلوقتي من القهوجي, بيلغي بيها الطلبات!
العبرة فـ الجدور اللي بينها جناس لفظي (شبه بعض), بالمخصص أو الرمز, هوه اللي بيحدد المعنا!
يعني عندنا أكتر من جدر بنفس حروف كلمة البوست:
سك/ سكت/ سكة = طريق/ شارع (سكة السلامة/ السكة الحديد/ السكة الزراعية)!
سك = قفل/ مزلاج (بعلامة السين اللي شبه ترباس البيوت القديمة)!
سك/ صك = طبع/ نسخ (سك النقود/ صكوك)!

سواق/ سائق


ساق/ سواق/ سواقة
التصريفة العربي (سائق), بتدي احساس ان دي كلمة عربي!
الكلمة موجودة فـ كلامنا المصري الحالي (اللغوة), بإعتبار (السواقة) مهنة مهمة فـ حياتنا, ولها نقابة كبيرة, بتضم (السواقين), ولها أمثال شعبية منها:
(السواقة) فن, مش عـن عـن!
الجدر المصري من مرحلة الخط الهيروغليفي:
ساق/ سعق = سايق (سائق)/ مرسال/ قاد (قائد)!
ومن كلامنا فـ الفلاحين:
-          فلان بيسوق البهايم!
-          رايح أسوق البهايم!
-          امشي سوق بهايمك من هنا!
الكلمة جدرها المصري واضح فـ صوته ومعناه, رغم اختلاطها مع التصريفة العربي (سائق), اللي موجودة فـ القرآن الكريم:
(وجاءت كل نفس معها سائق وشهيد) – سورة ق – الآية 26.
الجدر المصري للكلمة (ساق), أنتج تصاريف: ساق/ بيسوق/ سوق/ سواقة/ سواقين/ سائق/ سائقين .. لخ!
كل تصاريف الكلمة, مصري أو عربي أو غيرهم, من الجدر الأصلي, اللي فـ الصورة!
#كلامنا_مصري
...................
وسلامو عليكو